En ocasións, gardamos asociacións aparentemente ilóxicas nas
nosas cabezas, como pode ser un determinado alimento, por exemplo,
ligado a unha mala experiencia que tivemos no pasado. É precisamente
a base do sentimento do medo, que se define como un mecanismo de
defensa que nos impide volver a vivir situacións perigosas para a
nosa supervivencia.
Outras veces, relacionamos conceptos polo simple feito de
recoñecelos en conxunto en múltiples ocasións; o cinema e o resto
dos artes teñen moito que ver con isto, tanto para ben como para
mal. Nos sistemas simbólicos das películas repítense unha e outra
vez clichés asociados a conceptos que non teñen por que ter unha
base na nosa realidade. Eu, por exemplo, cando penso na guerra -así,
en xeral- véñenme á cabeza moitas cousas, entre elas a imaxe dunha
boneca abandonada, rota e pisada, no chan do campo de batalla.
A este cliché -ou arquetipo, podemos debater máis adiante sobre
a fina liña que separa ambos termos- adoitan chamalo empathy
doll shoot -plano de boneca de empatía- e podemos
situalo entre aqueles estereotipos orixinados e estendidos grazas á
linguaxe cinematográfica, que precisa dun achegamento máis visual
para explicar e transmitir ideas complexas e emocións.
Cando unha persoa acomete a escritura dun guión, tenta levar ben
gravada a lume na mente a máxima show, don’t tell, é
dicir, que mostres no canto de contar. Neste senso “contar”
refírese á explicación da boca das personaxes a través do diálogo
ou do monólogo en voice over, o que en inglés se
traduce como “exposition” e considérase un erro
cando se fai no contexto menos axeitado, porque saca ás persoas
da suspensión da incredulidadee polo tanto deixa
de implicarse emocionalmente na narración. Que cando unha personaxe
lle conta a outra explicitamente algo que ambos saben, pero o público
non, e se nota que só o están a contar para a audiencia, nos
decatamos de que nolo están a explicar a nós e fainos conscientes
de que estamos vendo un filme, no canto de deixarnos levar de maneira
fluída e sen costuras nin trucos a través do relato audiovisual,
como se estivésemos dentro.
Por iso o mostrar, non contar é importante na
linguaxe cinematográfica. Aínda que non é necesario aplicalo en
todos os casos, si é vital sabelo utilizar para dominar o arte
cinematográfico. A metonimia, un recurso estilístico do que temos
falado en varias ocasións nesta bitácora, é unha das principais
armas de aqueles que se adican a contar historias sobre o celuloide á
hora de transcribir un concepto difícil de transmitir de maneira
visual. Lembremos, trátase de mostrar unha realidade a través de
outra coa que teña unha relación coñecida polo espectador: expoñer
unha causa a través das súas consecuencias, un contido polo seu
contedor, un espazo polo obxecto ou suxeito que o ocupa, e viceversa
en todos os exemplos.
O plano de boneca de empatía é precisamente
unha metonimia que mostra, pero non conta, as
consecuencias dunha guerra, dunha batalla, dun conflito violento: que
a infancia, e por extensión todas as persoas inocentes, non están
exentas das consecuencias. A boneca abandonada pertenceu a unha
crianza, e o seu abandono supón en case todos os casos a implicación
de que a crianza dona do xoguete morreu.
Falabamos de que a metonimia axuda a transmitir unha idea difícil
de expoñer de maneira visual; en ocasións, porque a idea é
invisible, ou excesivamente complexa; noutras, como este caso, porque
a realidade pódese mostrar, pero feriría moitas sensibilidades. Ver
unha crianza falecida nun contexto de conflito bélico é unha imaxe
moi dura, que non todos os tipos de filmes aceptarían mostrar.
O shock emocional pode ser moi intenso para as
espectadoras. Para iso precisamos a metonimia, para implicar
cousas moi graves, sen ensinárnolas de maneira explícita.
En ocasións, por fortuna, a boneca retorna ás mans da crianza,
que escapou das peores consecuencias do conflito. A esperanza retorna
á narrativa e o futuro volve a estar asegurado.
Mentres que nalgúns casos pode tratarse dun cliché sobresaturado
que, como o seu propio nome indica, ten como principal función a
de “dar pena” e apelar á sensibilidade e á empatía do
público, en realidade, se lle dedicamos unha reflexión, trátase
dun símbolo cun significado moi complexo e profundo: a boneca ligada
á infancia, relacionada coa inocencia, cortada de raíz por culpa da
violencia. Un futuro truncado, non só da crianza, senón de toda a
comunidade, a vila arrasada, o colectivo ou o país. A inocencia
ligada ao horror, para facelo máis visceral a través do contraste,
como noutros arquetipos dos que temos falado, pero cun significado
moito máis explícito e narrativo: unha boneca abandonada é a
implicación da morte a destempo, un dos grandes traumas da
humanidade.
Quizabes por iso se trata dun dos arquetipos máis antigos,
presente dende o cinema silente até os nosos días. Un arquetipo que
alberga os maiores dos nosos medos, explicado dunha maneira clara e
concisa, aínda que o faga a través dunha asociación conceptual
moito máis complexa do que parece. Isto é só unha mostra de todas
as posibilidades da linguaxe cinematográfica, o arte de compoñer
ideas a través da imaxe en movemento.