Moi boas! Voltamos despois dunha grande pausa (ai, as cousas da vida…) pero cunha receita ben potente e saborosa. A idea desta receita veume ao ver un episodio da serie de Stanley Tucci “Searching for Italy”, no que visitaban a Emilia-Romagna e unha muller explicaba que a receita tradicional do ragú non leva aceite nen tomate.
Non teño tanto coñecemento disto e non quero entrar nunha espiral purista con italianos pero en todo caso parecéume unha proposta ben boa e tirei para adiante. Non me arrepinto! Está delicioso e pódese empregar tamén como recheo de lasaña, o importante é deixalo repousar, que sempre terá máis sabor.
Se lle queredes engadir un pouco de cor, botádelle un par de culleres de mollo de tomate. Tamén podedes cambiar o viño branco polo tinto: se o facedes, contade que tal nos comentarios! Tendes no blog outras receitas de pasta, coma esta lasaña, unha receita napoletana de pasta con grelos ou estes espaguetes á amatriciana 😉
Ingredientes (4 racións, aprox.)
50 gr de manteiga
100 de panceta sen afumar, ben picada
Media cebola, ben picada
Unha cenoura pequena, ben picada
Unha póla de apio, ben picada
200 gr de picada de vitela, da parte magra
200 de picada de porco
75 ml de viño branco
100 ml de caldo de verduras (vale de polo ou de carne tamén)
Dous beliscos de noz moscada
Dúas follas de loureiro
Sal e pementa ao gusto
75 ml de leite enteiro
- Nunha tixola coas paredes altas (ou pota coas paredes baixas) quecemos a manteiga a lume medio. Botamos a panceta e cocemos durante 3-4 minutos. Engadimos a cebola, a cenoura e o apio, seguimos cocendo a lume medio e remexendo ata que a verdura estea tenra.
- Botamos a picada de vitela e a de porco e deixamos que perda a cor “crúa”. engadimos o viño e cocemos 2-3 minutos máis, ata que case non quede líquido.
- Engadimos o caldo quente (do micro ou dunga pota), a noz moscada, o loureiro, sal e pementa. Mellor botar aos poucos e corrixir ao final.
- Quecemos o leite ata que bula, pero non chegue a ferver. Engadímolo á mestura e remexemos ben ata que estea ben repartido e mesturado.
- Baixamos o lume (nunha escala de 10, ao 2 aprox.) e deixamos repousar dúas horas. Non debe ferver, só sacar burbullas de cando en vez. Axustamos o sal e a pementa e deixamos repousar un d´ía no frigorífico.
- Para esta receita precisamos unha pasta que agarre ben, o mellor é usar tagliatelle frescos (hainos no Lidl moi ben de prezo). Se non, hai tagliatelle secos de Barilla e outras marcas na maioría das grandes superficies. Se vedes que o ragú está moi espeso despois de quentalo, podédelo rebaixar cun pouco de auga de cocer a pasta, antes de mesturar todo.
Que aproveite!
