Amazfit porá á venda este mes o seu anel con monitorización de actividade

Que Samsung estea a prepararse para lanzar un anel que permita monitorizar a actividade física dun xeito menos intrusivo que un reloxo leva a pensar que podemos estar ante a popularización deste tipo de accesorios, e unha marca que nos resulta moi familiar, Amazfit, quere adiantarse anunciando que o vindeiro 15 de maio vai pór á venda nos EE.UU. o Amazfit Helio Ring a un prezo de 299,99 dólares (aínda que reduciría o seu prezo até os 149,99 dólares de adquirirse en conxunto con reloxo Amazfit Cheetah Pro ou o T-Rex Ultra), confirmando que teñen previsto levar o produto a máis mercados en breve.
O Amazfit Helio Ring é un discreto accesorio delgado (2,6 milímetros de grosor), lixeiro (menos de 4 gramos) e resistente á auga, que pode facer un seguimento do ritmo cardíaco, o nivel de osíxeno en sangue e o estrés, podendo servir tamén para facer un seguimento do sono. Compleméntase cunha aplicación móbil que facilita a interpretación dos datos recollidos. Tamén poderá sincronizarse coas aplicacións deportivas máis populares (adidas Running, Google Fit, Apple Health, Strava...).
Inicialmente só vai estar dispoñible nun par de talles, pero xa está prevista a súa fabricación en 7 talles diferentes.
O dispositivo ten unha autonomía de até 4 días e pode cargarse sen fíos en aproximadamente unha hora e corenta minutos.
Queda agora por ver se realmente hai demanda para este tipo de monitor de actividade, e se a xente apostará por dispositivos económicos ou preferirá opcións de alta gama como as que moi probablemente veremos nos vindeiros meses.