Actualidade A nova beta pechada de Street Fighter 6 comezará a mediados deste mes

A nova beta pechada de Street Fighter 6 comezará a mediados deste mes

Capcom acaba de anunciar unha segunda beta pechada para Street Fighter 6, a nova entrega dunha das máis lendarias franquías dentro dos xogos de loita. Será celebrada, segundo o indicado pola compañía, entre o 16 e o 19 de decembro, e xa é posible apuntarse para ter a posibilidade de recibir acceso á mesma.

Ora ben, o contido desta nova fase de probas será o mesmo que o da primeira, mais introducindo algúns cambios e melloras en base a erros detectados durante a primeira beta. Por exemplo? Unha nova opción gráfica para reducir o input lag.

A nova fase experimental estará dispoñíbel en PlayStation 5 e Xbox X|S, ademais de PC a través de Steam. Cómpre dicir que o título de loita sairá tamén en PS4, pero non en Xbox One.

Se tes sorte de ser escollido para a beta poderás coñecer os movementos de oito personaxes: Luke, Jamie, Ryu, Chun-Li, Kimberly, Juri, Ken e Guile; e se xa estiveches na primeira, non te preocupes, seguirás tendo acceso a esta.

Carlos Pereiro

Creador de Morcego. Escribo cousas, falo de cousas e encántame escoitar cousas.